جموں/ولایت ٹائمز نیوز سرویس/ جموں کشمیر اور لداخ کی مختلف دینی و سماجی تنظیموں نے مشترکہ طور اسلامی انقلاب ایران کی ۴۶ویں سالگرہ کے موقعہ پر جموں میں ایک عظیم الشان کانفرنس کا انعقاد کیا حس میں علمائے کرام، دانشور حضرات، طلاب ، شعراء کے علاوہ عوام کی کثیر تعداد نے شرکت کی۔
ولایت ٹائمز نیوز سرویس کو ملی اطلاعات کے مطابق شیعہ فیڈریشن جموں، انجمن حسینی بٹھنڈیٰ، جامعہ امام خمینی کرگل، انجمن صاحب الزمان کرگل، انجمن امامیہ لیہ اور رحمت للعالمین فاؤنڈیشن کے باہمی اشتراک سے جشنِ بزرگ انقلاب اسلامی کی مناسبت سے ایک شاندار تقریب کا انعقاد کیا گیا۔ اس تقریب میں علمائے کرام، دانشوروں، شعراء، طلبہ اور عوام کی ایک بڑی تعداد نے شرکت کرکے انقلاب اسلامی کو خراجِ عقیدت پیش کیا۔
مقررین نے انقلاب اسلامی کی اہمیت، اس کے اثرات اور شہدائے انقلاب کی قربانیوں پر روشنی ڈالی۔ مقررین نے انقلاب اسلامی کو محض ایک سیاسی تبدیلی نہیں بلکہ ایک فکری اور روحانی انقلاب قرار دیا جو دنیا بھر کے لیے روشنی کا مینار ثابت ہوا۔
اس عظیم الشان محفل کی صدارت معروف عالم دین حجتہ الاسلام والمسلمین مولانا جنان اصغر مولائی نے کی ۔شیعہ فیڈریشن کے صدر الحاج عاشق حسین خان نے خطبہ استقبالیہ پیش کرتے ہوئے کہا کہ انقلاب کے تئیں ہماری عقیدت، ہمارے ایمان کا حصہ ہے۔ انہوں نے کہا کہ انقلاب اسلامی نے دنیا میں ایک نئی روح پھونکی اور مظلوموں کو استعماری طاقتوں کے خلاف اٹھ کھڑے ہونے کا حوصلہ دیا۔
تقریب کی نظامت انجمن امامیہ بٹھنڈی کے جنرل سیکرٹری سید فدا حسین رضوی نے انجام دی، جبکہ اختتام پر لال دین صاحب نے خطبہ شکرانہ پیش کیا۔ اس موقع پر حجتہ الاسلام والمسلمین مولانا مختار جعفری،حجتہ الاسلام والمسلمین محمد محمدی،حجتہ الاسلام والمسلمین زوار جعفری،معروف سماجی کارکن شیخ فردوس علی، سید عابد صفوی اور جامعہ امام خمینی کرگل و انجمن صاحب الزمان کرگل اور امامیہ مشن لیہ سے وابسطہ علمائے کرام و طلبا نے انقلاب اسلامی کے تئیں بھر پور عقیدت کا اظہار کیا اور انقلاب اسلامی کے فلسفے اور اس کے اثرات پر تفصیلی گفتگو کی۔مقررین نے بھی تقریب سے خطاب کرتے ہوئے بانی انقلاب اسلامی حضرت امام خمینیؒ اور شہدائے انقلاب کو سلامِ عقیدت پیش کیا۔ انہوں نے کہا کہ انقلاب اسلامی صرف ایک قوم یا ملک تک محدود نہیں بلکہ یہ مظلوموں کی فتح اور باطل کے خلاف صدائے حق کی علامت ہے۔
شرکا نے اس عزم کا اعادہ کیا کہ وہ ہمیشہ حق اور انصاف کی حمایت کرتے رہیں گے اور اس انقلاب کے اصولوں پر عمل پیرا رہیں گے۔